ಅಂತಿಮ

ಕಂಪಿಸುವ ಭೂಮಿ 

ಕಾಲ ಕೆಳಗೇ ಕುಸಿಯಲಿ 

ಪರ್ವತಗಳು ಬಾಯ್ತೆರೆದು 

ಬೆಂಕಿಯ ನೀರನ್ನೇ ಉಗುಳಲಿ 

ಬಿರುಗಾಳಿ, ಚಂಡಮಾರುತ 

ನನ್ನನ್ನೇ ಹೊತ್ತೊಯ್ಯಲಿ ದೇಶಾಂತರ 

ಭೂಮಿಯ ಆಯಸ್ಕಾಂತವೇ 

ಹಿಮ್ಮುಖವಾಗಿ ಎಳೆದರೂ 

ನಾನು ನಿನ್ನೆಡೆಗೇ ನಡೆಯುತ್ತಿದ್ದೇನೆ 

ನೀನೂ ನನ್ನಡೆಗೇ ಬರುತ್ತಿರುವಿಯೆಂದು 

ನಂಬಿದ್ದೇನೆ 

ನಮ್ಮ ಪ್ರೀತಿಯೇ ನನ್ನ ದಿಕ್ಸೂಚಿ 

ಪ್ರತಿ ದಿನವೂ, ಪ್ರತಿ ಕ್ಷಣವೂ 

ನಿನ್ನ ತಲುಪುವುದೇ ನನ್ನ ಗುರಿ 

ಜೀವನದ ಬಾಗಿಲು ಕಿಟಕಿಗಳೆಲ್ಲಾ 

ನಿನ್ನನೇ ತೋರಿಸುವ ಸಾಧನಗಳು 

ನಾನು ಬೆಳೆಯುತ್ತಲೂ ಇದ್ದೇನೆ 

ಗಳಿಸುತ್ತಲೂ, ಕಳೆಯುತ್ತಲೂ ಇದ್ದೇನೆ 

ನನ್ನೊಳಗಿಂದ ನಾನೇ 

ರೂಪಾಂತರವಾಗುತ್ತಲೂ ಇದ್ದೇನೆ 

ನನ್ನನ್ನು ನನ್ನೆಲ್ಲಾ ರೂಪಗಳೊಂದಿಗೆ 

ಕುರೂಪ, ವಿರೂಪಗಳೊಂದಿಗೆ 

ನೀನು ಪ್ರೀತಿಸುವೆಯೆಂದು 

ಜನ್ಮ ಜನ್ಮಾಂತರಗಳಿಂದಲೂ 

ನಿನ್ನೆಡೆಗೇ ಬರುತ್ತಿದ್ದೇನೆ 

ನನ್ನ ಹೃದಯದ ಬಡಿತವೇ ಸಾಕ್ಷಿ 

ನಿನ್ನ ಅಸ್ತಿತ್ವಕ್ಕೆ 

ನಿನ್ನ ತಲುಪೇ ತಲುಪುತ್ತೇನೆ 

ನನ್ನದೆಲ್ಲವನೂ ಹೊತ್ತು ತರುತ್ತೇನೆ 

ನಿನ್ನ ಪದತಲದಲ್ಲಿ ಹಾಕಲು 

ನಿನ್ನ ಕೂಡುವ ಘಳಿಗೆಯ ನೆನೆದು 

ಅಸಹನೆಯಲಿ ಬೇಯುತ್ತೇನೆ 

ನೀನೂ ನನಗಾಗಿ ಇದೇ ರೀತಿ 

ಚಡಪಡಿಸುತ್ತಿರುವೆಯಾ? 

ನನ್ನಡೆಗೆ ಬರಲು 

ಯುದ್ಧಗಳನೇ ಹೂಡಿರುವೆಯಾ? 

ನಾನು ನಿನ್ನವಳೇ ಎಂದು  ನನ್ನನು 

ನಿನ್ನಡೆಗೇ ಸೆಳೆಯುತ್ತಿರುವೆಯಾ? 

ನನಗಾಗಿ ಕಾಯುತ್ತಿರುವೆಯಾ? 

ಕನಸುತ್ತಿರುವೆಯಾ? 

ಕವಿತೆಗಳ ಬರೆಯುತ್ತಿರುವೆಯಾ? 

ಅಥವಾ ನಿನ್ನ ಬೃಹತ್ ಗಾತ್ರಕ್ಕೆ ನಾನು 

ಅಗೋಚರೀ ತೃಣ ಮಾತ್ರವೇ? 

ಭಾಶೇ