ಮೇಲ್ಮುಖವಾಗಿದ್ದು ಒಳಮುಖವಾಗಿದೆ
ಅಂತರಾಳವನ್ನೆಲ್ಲಾ ಬಗೆದು ಶೋಧಿಸಿದೆ
ನೀರಿಲ್ಲ
ಆಕಾಶ ತುಂಬಿರುವ ತುಂಟು ಬಿಳಿಮೋಡಗಳಲ್ಲಿ ನೀರಿಲ್ಲ
ಹಿಂದಿನ ನಿಲ್ದಾಣದಲ್ಲೇ ಸುರಿದಾಗಿದೆ
ಭಾರ ಕರಗಿ ಮೈ ಹಗುರಾಗಿದೆ
ನೀರಿಲ್ಲ
ತೇಲುವ ಮೋಡವ ಕಂಡ ಬಾವಿಗೆ ತಾಳ್ಮೆಯಿಲ್ಲ
ಮಳೆಯೇ ಬಂತೆಂದು ಖುಷಿಗೊಂಡಿದೆ
ತಿಳಿನೀರನುಕ್ಕಿಸಲು ಸಜ್ಜಾಗಿದೆ
ತಾಳ್ಮೆಯಿಲ್ಲ
ಸುಡು ಸುಡು ಎಂದು ಸುಡುವ ರವಿಗೆ ಕಣ್ಣಿಲ್ಲ
ನೆಲ ಬಿರುಕಾಗಿ ಒರಟಾಗಿದೆ
ಬೇರು ಬಳಲಿ ಮೀನು ಗುಳೆಹೋಗಿದೆ
ಕಣ್ಣಿಲ್ಲ
ಮೋಡಕ್ಕೆ ಪರಿತಪಿಸಿ ಕಾಯುವ ಬಾವಿಗೆ ಬಾಯಿಲ್ಲ
ತಂಪಿಲ್ಲದೆ ಒಳಗೇ ಬಿಸಿಯಾಗಿದೆ
ಕನಸೆಲ್ಲಾ ಹಾಗೇ ಹುಸಿಯಾಗಿದೆ
ಮುಗಿಯಲ್ಲ
ಭಾಶೇ
No comments:
Post a Comment