ಗರ್ಭಪಾತ

ಹೊಟ್ಟೆಯಲಿ ಹುಟ್ಟಿದ್ದ ಕನಸೊಂದು ಕಸವಾಗಿ ಕಮರಿಹೊಯ್ತು
ಅದಿತ್ತಿದ್ದ ನಿರೀಕ್ಷೆ, ಭರವಸೆಗಳೆಲ್ಲ ಬಸಿದುಹೋಯ್ತು

ಕೈಯಲ್ಲಿದ್ದ ಮದರಂಗಿಯ ಕೆಂಪು ಆರುವ ಮುನ್ನ
ಕಣ್ಣಲ್ಲಿ ಹೊಸತೊಂದು ಆಸೆ ಬೆಳೆದಿತ್ತು, ನಲಿದಿತ್ತು
ಮನದೊಡೆಯನ ಪ್ರೀತಿ ಸುರಿದಿತ್ತು ಮಳೆಯಾಗಿ
ಹರಿದಿತ್ತು ಹೊಳೆಯಾಗಿ, ತುಂಬಿಸಿ ನನ್ನೊಡಲ

ಒಂದೊಂದೇ ಆಸೆಗಳ ಎತ್ತಿಟ್ಟು ಕಾದಿದ್ದೆ
ಖುಷಿಯ ಹೊನಲು ಹರಿದಿತ್ತು ಗೀಟುಗಳೆರಡು ಮೂಡಿದಾಗ
ಸ್ವರ್ಗಕ್ಕೆ ಮೂರೇ ಗೇಣು ಇನಿಯನ ಕಿವಿಯಲಿದ ಒಸರುವಾಗ
ಸ್ವರ್ಗವೇ ಧರೆಗಿಳಿದಿತ್ತು ಅವನ ಕಣ್ಣಲಿ ಸಂತೋಷ ಉಕ್ಕಿ ಹರಿದಾಗ

ಒಂದಿಷ್ಟು ಇರಿಸು ಮುರಿಸು, ಹಿಂಜರಿಕೆ, ಗೊಂದಲ
ನಾಳೆಗಳ ಕನಸುಗಳು ಹೊಳೆಯಾಗಿ ಹರಿದಿದ್ದವು
ಮೈದುಂಬಿ, ಮನದುಂಬಿ, ಕಣ್ದುಂಬಿ ನಲಿದಿದ್ದೆ
ಸಂತೋಷವೆಂಬ ಪದಕ್ಕೂ ಅಸೂಯೆ ಬರುವಂತೆ

ವಿದಿರಚಿಸಿತ್ತು ಈ ಸಂತೋಷವ ಕೀಳುವ ಹೂಟ
ಅವಘಡಕ್ಕೆ ಸಿಕ್ಕಿ ಬಲಿಯಾಗಿತ್ತು ಕನಸುಗಳ ಮಹಲು
ಸೂತಕದ ಛಾಯೆ ಇನ್ನೂ ಇಳಿದಿಲ್ಲ ಮುಖದಿಂದ
ಭರವಸೆಗಳೇ ಬಂದೆನ್ನ ಖಾಲಿಯೆದೆಯ ತುಂಬಿ

ಭಾಶೇ