ಗಂಡಸರೇ

ನಿಮ್ಮ ಕೀರ್ತಿಯ ಬಸಿರ ಹೊರಲು ನಾವೇ ಬೇಕು
ಇಲ್ಲದ ಸಂಭ್ರಮ ನಿಮ್ಮಲ್ಲಿ, ಬೀಗುವಿರಿ ದೊಡ್ಡದೇನೋ ಸಾಧಿಸಿದ ಖುಷಿಯಲ್ಲಿ
ಹೊಟ್ಟೆಯಲ್ಲಿರುವ ಚಿಗುರಿನ ಬೇರು
ಯಾವತ್ತೂ ನಮ್ಮ ಹೊಟ್ಟೆಯ ಗುಟ್ಟು, ನಿಮಗೇನು ಗೊತ್ತು?

ಬೊಗಸೆ ಪ್ರೀತಿಗಾಗಿ, ಗೆಳೆತನಕ್ಕಾಗಿ ಬೇಡುವ ನಾವು
ಅದಕ್ಕೇ ಹಿಗ್ಗಿ ಹೀರೆಕಾಯಿಯಾಗುವ ನೀವುಗಳು
ನಾವೇ ಬಿಟ್ಟು ಕೊಟ್ಟ ರಾಜ್ಯಕ್ಕೆ ಅಧಿಪತಿಯಾಗಿ
ನಮ್ಮ ಮೇಲೇ ದಬ್ಬಾಳಿಕೆ ಮಾಡುವ ಮೀಸೆ ಹೊತ್ತ ಜಿರಳೆಗಳು

ಎಂದಿಗೂ ತ್ಯಾಗ, ಬಲಿದಾನವೆಲ್ಲಾ ಹೆಣ್ಣಿನ ಜವಾಬ್ದಾರಿಯೇ
ಮೈ ಬೆಳೆದರೂ ಬುದ್ಧಿ ಬೆಳೆಯದ ಗಂಡುಕುಲಕ್ಕೆ
ಹೆಣ್ಣು ಜಾತಿಯ ಅರ್ಥವಾಗದ ತಳಮಳಗಳ ತಿಳಿಸಬೇಕು
ನಿಮ್ಮನ್ನು ಮನುಷ್ಯರಾಗಿಸುವಲ್ಲಿ, ನಮ್ಮ ಕೂದಲು ಹಣ್ಣು

ನಿಮ್ಮ ಹೆತ್ತಿದ್ದಕ್ಕಾಗಿ, ಪೊರೆದಿದ್ದಕ್ಕಾಗಿ, ಸಂತಾನ ಸುಖ ನೀಡಿದ್ದಕ್ಕಾಗಿ
ಪಿತೃಗಳೆಂದಿದ್ದಕ್ಕಾಗಿ, ನಿಮಗಾಗಿ ಅತ್ತಿದ್ದಕ್ಕಾಗಿ, ನಿಮ್ಮೊಡನೆ ನಕ್ಕಿದ್ದಕ್ಕಾಗಿ
ನಮ್ಮನ್ನೂ ಒಮ್ಮೊಮ್ಮೆ ಪರಿಗಣಿಸಿ, ನಿಮ್ಮ ಆದ್ಯತೆಗಳಲ್ಲಿ
ನಿಮಗೆ ನಾವಿತ್ತ ಸಂಭ್ರಮದಲ್ಲಿ, ನಮಗೂ ಒಂದು ಪಾಲಿರಲಿ.

ಭಾಶೆ