ವಿದ್ರೋಹ

ಎಲ್ಲಿ ಬಿಟ್ಟು ಹೋಯ್ತೋ 

ಅಲ್ಲಿಂದಲೇ ಶುರುಮಾಡಲಾಗಲ್ಲ 

ನಿನ್ನ ಬೆಚ್ಚನೆಯ ಕೈ ಹಿಡಿತ ತಪ್ಪಿ 

ನನ್ನ ಕೈ ಮರಗಟ್ಟಿ ಹೋಗಿದೆ 

ನನಗರಿವಾಗದೇನೇ 

ಮುಳ್ಳುಗಳ ಸರಮಾಲೆ ಸುತ್ತಿದೆ 

ಹರಿದು ಹೋದ ಕಣ್ಣೀರನೂ

ವಾಪಸ್ಸು ತರಲಾರೆ 

ಬಿಟ್ಟು ಹೋಗಿದ್ದು ಎಲ್ಲೋ 

ನಾನೀಗ ನಿಂತಿರುವುದು ಇನ್ನೆಲ್ಲೋ 

ಸೇತುವೆ ಕೆಳಗಿನ ನೀರು 

ಹರಿದು ಹೋದದ್ದು ನೀರಲ್ಲ 

ನನ್ನ ಎದೆಯ ಉಸಿರು 

ಸೇತುವೆಯೂ ಉಳಿದಿಲ್ಲ 

ಭಾವನೆಗಳ ಪ್ರವಾಹಕ್ಕೆ 

ಬಿಟ್ಟು ಹೋದವನ 

ಕಳೆದು ಹೋದವನ 

ಕಾಯಲು 

ನೀ ಕೃಷ್ಣನೂ ಅಲ್ಲ 

ನಾ ರಾಧೆಯೂ ಅಲ್ಲ 

ಇದು ಅಂತಹ ಪ್ರೀತಿಯೂ ಅಲ್ಲ 

ಹನಿಯಾಗಿ ಜಿನುಗಿದ್ದು 

ತೊರೆಯಾಗಿ ಹರಿದಿದ್ದು 

ನದಿಯಾಗಿ ಕೊಚ್ಚಿದ್ದು 

ಇಂದು ಬತ್ತಿಹೋಗಿದೆ 

ಕಾಲ ಕಾರಣನೇ? 

ಹವಾಮಾನ ವೈಪರೀತ್ಯವೇ? 

ಪ್ರಕೃತಿ ವಿಕೋಪವೇ? 

ಆದದೆಲ್ಲಾ ಆಗಿಹೋಗಿದೆ 

ಬದಲಾವಣೆ ಜಗದ ನಿಯಮ 

ನೆನ್ನೆ ಮನಸಿಗೆ ಕೀಲಿಯಾಗಿದ್ದು 

ಇಂದು ಅಹಿತವೂ,

ಅಸಹ್ಯವೂ ಆಗಬಹುದು 

ಹೊಸ ಆರಂಭಗಳು 

ಹಳೆಯ ಸ್ಲೇಟಿನ ಮೇಲಾದರೆ 

ಬರೆದಳಿಸಿದ ಗುರುತು 

ಕಾಡದಿರಲಾರದು 

ಸೌಮ್ಯಶ್ರೀ ಗೋಣೀಬೀಡು